و زى ما وعدت لقاء حصري للبلوج مع مؤسس konzaross خالد سلام ((BASS and vocals only )),,,,

اولا نبذة عن konzaross و مؤسسه:-

konzaross عبارة عن بروجكت BASS and vocals only بدا من سنة 1997 على ايد  خالد سلام  و زى ما هو واضح one man project. خالد من مواليد القاهرة 1976 اما الجينر   Psychedelic  Melodic  Dark  Music  -  State Of  Mind Music   و هو نوع خاص ابتكره خالد من خلال البروجكت بتاعه خلونا نعرف اكتر عن خالد و البروجكت من خلال اللقاء ده.

....

1- احكيلنا عن بداية الkonzaross و ليه عملته؟؟

الموضوع ابتدى سنة 1997, السبب انى عملته اسباب كتيرة منها ان الموسيقى في الوقت ده كانت كلها شبه بعض و مكنش فيه اى جديد, و بشكل عام الموسيقى افتقدت مصدقيتها بشكل كبير و الالحان بقت زى بعض مفيش جديد. و كان هدفى انى اتكلم عن الانسان و وذاته و الوقائع اللى بنمر بيها في حياتنا بشكل عام.

2- اى فريق او مغنى بيبقى له موسيقى معينة اثرت فيه و بتلهمه ايه الموسيقى اللى الهمتك و انت بتعمل konzaross ؟؟

موسيقى الروك و الميتال هى اللى الهمتنى بفكرة البروجكت.

3- ايه سبب اختيارك للBASS بالذات؟؟

انا لما ابتديت العب BASS سنة 1994 ناس قليلة كانت بتستخدمه و عجبنى صوت الالة. و بصراحة حق الالة مهضوم جدا فقررت انى استخدمها بشكل جديد و مبتكر غير كده حسيت انها بتعمل احساس مختلف.

4- ايه سبب اختيارك ان الموضوع يبقى one man project ؟؟

في سنة 97 زى ما قلت كانت ليا اهداف في الة الbass كفكر و زى ما قلت كنت عايز ابينها بشكل جديد و مختلف علشان كده قررت اعمل الموضوع لوحدى و ده بعد ما الفت الحان و كلمات على الالة. سنة 99 قررت انى اعمل فريق كامل بس ده حاجة جنب one man project الاساسي   konzaross  _BASS and Vocals _only علشان ابين برده الbass بشكل مختلف مع الفريق و كمان كنت بفكر اعمل البومين في السنة مره مع الفريق و مره من خلال konzaross و فعلا لحنت حاجات لكل الالات و بدات ادور على اعضاء علشان اكون الفريق في نفس الوقت كنت عملت البومين مع مغنى بس مع الbass بس تسجيلهم كان ردىء لان مكنش في امكانيات كويسة للتسجيل بس المغنى مشي و انا كملت بحث عن اعضاء اعمل بيهم الفريق بس ملقتش ناس مناسبة للفريق فقررت اركزعلى konzaross و صرفت نظر عن فكرة اكون فريق نهائيا.

5- لاحظت من خلال اغانيك و قصتك انك بتلعب جينر مختلف و اسمه مختلف ايه سبب التسمية دى و ايه معنى الاسم ؟؟

PSYCHEDELIC MELODIC DARK MUSIC  

سيكدلك ككلمة معناها حالة ذهنية  و ميلوديك دى الجمل اللحنية اللى الالة بتصدرها و كلمة dark هنا معناها مضمون النفس الداخلية للانسان او الجوانب الداخلية و الخفية للانسان.

6- من خلال كلامك و من الموقع بتقول ان اغانيك مش بتتسمع في اى وقت فياريت تقلنا ليه؟؟ و ايه الاوقات اللى ممكن الواحد يسمع فيها اغانيك؟؟

state of mind و ده معناه ان موسيقتى موسيقى تاملية ليها وقت معين و موود معين علشان نسمعها فيها و نفهمها. و السبب ان الموسيقى ده بتخاطب عقل و ذهن اللى بيسمعها لانها بتاخدك من الواقع لعالم تانى لانها بتساعدك على تصفية ذهنك و تفكيرك في حاجات كتيرة بتحصل في حياة المستمع و الحياة ككل بشكل عام. انسب وقت تقدر تسمع موسيقتى فيها لما بتكون عايز تنعزل عن العالم اللى حوليك و تفكر في حاجة او مشكلة عايز تحلها و تفكر في حياتك بشكل عام.

7- konzaross اسم يلفت الانتباه بس ايه معنى الكلمة دى؟؟

قلعة من العصور الوسطى .

8- لما بسمع اغانيك بلاحظ انك بتستخدم مؤثرات سمعية من الحياة في الموسيقى بتاعتك زى الموج مثلا و اصوات قنابل ....... الخ, بطريقة مختلفة و جديدة, ايه سبب استخدامك للمؤثرات دى؟؟

المؤثرات دى بتمثل رموز في النفس البشرية و بتوصل لكل واحد فينا بطريقة مختلفة زى مثلا الموج بتمثل لواحد مثلا العزلة و صوت القنابل بتمثل لواحد تانى الصراعات لكن الفكرة الاساسية اللى بعبر بيها بتكون مختلفة من جوايا. 

9- ازاى بتفكر في افكار و مواضيع اغانيك؟؟

كل كلماتى بشكل عام عن واقع الحياة و صراعات نفس الانسان. لازم اعيش حالة الاغنية قبل الكتابة فالاغنية بتكون مدفونة في ذهنى من فترة طويلة و لما بتحصلى حاجة معينة او موقف بسترجع الكلمات من ذهنى و بقوم بعدها بكتابة و تلحين الاغانى من اعماقى الداخلية علشان كده هتحس ان موسيقتى مختلفة وواقعية.

10- ازاى بتسوق البوماتك ((اسطوناتك))؟؟

انا بنتج البوماتى بنفسي و ببيعها لكل الناس و لمستمعى الموسيقى بشكل عام بالنسبة للاجانب ببعها للاجانب جوا و برة مصر حسب العدد المطلوب و في مصر بعمل دعاية للالبوم و ببيعها حسب الكمية المطلوبة من الناس اللى عايزة تشترى ليها و لمعارفها و بعد فترة ((شهور او سنة)) بحطها على الموقع بتاعى و بتكون متاحة للدونلود. 

11- كنت من فترة قريت لقاءات ليك مع اجانب, و طبعا ده يخلينى اسال ازاى قدرت توصل الموسيقى بتاعتك ليهم؟؟

ده بفضل ربنا اولا و انا ليا اصلا تعاملات مع اجانب بره مصر و اللقاءات بتم على طلبهم بعد ما استمعوا للاغانى بتاعتى و اعجبوا بها. 

12- بتعمل حفلات من اى نوع؟؟

بعمل حفلات خاصة حسب الطلب و كنت عايز اعمل حفلات في بعض الاماكن العامة من فترة بعيدة, بس كان في حالة عدم مبالاه من الجهات المعنية.

13- انا كنت عرفت ان حضرتك بتعلم bass ممكن تقلنا اكتر عن الموضوع ده و قلنا عن اسلوبك في التعليم؟؟

 انا بعلم من زمان و الدروس بتبقى خاصة و فى مراكز و مدارس كمان, المتلقى بيطلع فاهم كويس جدا و انا بيكون ليا اسلوب خاص في التعليم بنوع من الابتكارية و الاحترافية للمتلقى, و بعدها ممكن يعمل فريق او مشروع خاص بيه لموسيقته الخاصة لانى بعلم ازاى تلحن و تبتكر اغانى خاصة بيك خلال الدراسة. 

14- رايك ايه في الفرق الموجودة حاليا على الساحة في مصر؟؟

رايي ان معظم الفرق كويسة  و بتمنى لها التوفيق و انا سعيد انهم بداوا يسجلوا الاغانى الخاصة بيهم و انا بتمنى ان الدولة تهتم بالموسيقى بشكل عام بشكل افضل.

15- في اى مشاريع جديدة ناوى تعملها؟؟

ان شاء الله كل حاجة في وقتها و ممكن متابعة احدث الاخبار من خلال موقعى.

الحوار انتهى و اتمنى انه يكون عجبكم هحط في الاخر موقع البروجكت علشان لو عايزين تعرفوا معلومات اكتر...

الموقع((بيشمل كل حاجة صور و بيو و كل حاجة))

http://WWW.KONZAROSS.TK/

لمتابعة احدث اخبار البلوج على الفيس

http://www.facebook.com/pages/Have-a-nice-day-sam-ramirez-musical-blog/157959817636775

تحياتى...